Sorina Erasmus

Sorina Erasmus

Sorina Erasmus | Suid Afrikaanse Kunstenaars

Sorina Erasmus is ‘n Suid Afrikaanse sangeres, akteur en ook bekend as die Flooze.

Welkom in ons Wereld (Sorina Official Musiekvideo)
DIE BLIENGMASJIEN - Flooze
Kry 'n kwotasie
Indien daar meer as een kunstenaar optree moet daar 'n klankmaatskappy ingehuur word deur die kliënt.
Indien die kliënt klank voorsien, moet dit aan die spesifikasies van die kunstenaar se tegniese vereistes voldoen.

Diskografie

Die Bliengmasjien -- 2018

Hoofletters -- 2015

Ek watch jou -- 2011

Hoezit my Tjomma -- 2009

Engel met ‘n Angel -- 2007

Biografie

Sorina Erasmus, aka Flooze, is ‘n Suid Afrikaanse sangeres en aktrise. Sy word as een van Suid-Afrika se supercool A-lys sterre beskou… tog dra haar alter ego die kroon as die “kômminste girl oppie teevee”.

Sy sit met ‘n meestersgraad in die regte agter haar naam… tog speel sy haar sepie-rol as ‘n ongeslypte rowwe diamant só oortuigend dat ‘n mens soms wonder wie sy werklik eintlik is…

Sulke uiterstes is maar net ‘n paar van vele kontrasterende aspekte in hierdie multi-talentvolle kunstenaar se kraal.

Welkom by die alter ego en preutse koekie se tweegeveg.

Dis FLOOZE versus SORINA

ZEFFER versus TREFFER

GLITTER versus SKITTER

WILLER versus STILLER

Haar album “HOEZIT MY TJOMMA”, het goue status bereik en haar welbekende “Floozerayna” moves is so aansteeklik soos waterpokkies in Witbank. 

Met haar album “EK WATCH JOU”, is die groot vraag egter: WIÉ WATCH DIÉ RONDTE VIR WIÉ…

In hierdie album word die kontras tussen al die verskeie vlakke en fasette van haar God-geseënde talente en genade-gawes tot die uiterste aan die publiek bekend gestel . 

Die ondertoon van die album is ‘n samesnoering van emosies in die oortreffende trap. Want hierdie keer lag ons dat die valstande rol. Sing ons dat die kranse antwoord gee, dans ons soos kaalvoet-lovers in somerreën, leef ons asof die uurglas reeds leeggeloop het en helaas huil ons ook saam met almal wie langs die pad die stryd verloor het.

Sy het al die liedjies op die album self geskryf, en met die hulp van ‘n span ewe-kreatiewe vervaardigers, druk sy haar stempel behoorlik af as liedjieskrywer.

Sy is ‘n doodgewone maltrap-meisiekind wat groot geword het op ‘n plaas in die Naboomspruitse bosveld. 

Na skool het sy haar regsgraad aan die Universiteit van Pretoria behaal waarna sy ook haar meestersgraad in kinderreg verwerf het. 

Sy het egter besluit om haar op die kunste toe te spits en het (helaas!) drama gaan swot by die eertydse Technikon Pretoria (deesdae TUT).

Gedurende haar eerste vryskutjaar as aktrise was sy dikwels mismoedig omdat min, of soms geen werk nie, haar kant toe gekom het. 

Uit pure radeloosheid skryf sy daardie jaar ‘n liedjie “en sit sommer ‘n wysie daarby”.

En so ontdek sy ‘n verborge talent toe haar eerste liedjie by name “Plankevrees”, ‘n paar minute later gebore is. 

Sy skryf dit in 2004 vir ATKV se Crescendo liedjieskryf-wedstryd in, en dit dring deur tot die semi-finaal.

Dit is toe dat sy pen op papier begin sit, skryf soos ‘n tikmasjien, en die daaropvolgende jaar eindig met ‘n plek in die finaal.

Die werkloosheid het egter steeds hard aan haar deur geklop.

Maar geduld en geloof het haar tydens dié moeilike jare laat aanhou glo dat sy eendag die vrugte van God se genade sal pluk, en ‘n paar jaar later is  haar CV beslis ‘n bewys daarvan. 

Op haar kerfstok is immers nie net televisie-werk nie. 

Sy het haarself ook as ’n professionele aktrise in die teater gevestig met verhoogstukke/kabarette. 

Soos Swartskaap (saam onder andere Dawid Minnaar). Haar Hare (met Karen Wessels, Lindie Stander, Bertha le Roux en Alexa Strachan).

Leunverklikker (met Tobie Cronje as regisseur), Assie Kluite Klop (met Sandra Prinsloo as regisseur en Christa Steyn as musikale regisseur). 

Ook ’n KKNK hooffees produksie – Ons wil lewe; Ons gaan sterwe (wat sy in 2008 self geskryf, én die regie behartig het).

Deur die jare van televisie en teater het sy egter haar talent as kreatiewe liedjieskrywer verder ontgin.

In 2007 is negentien “siel-songs” vasgevang in haar eerste onafhanklike CD getiteld “ENGEL MET ’N  ANGEL”. 

Vandaar is die “sing-ding” egter aan die rol gesit, en sedertdien is daar geen keer aan hierdie go-getter tjomma nie.

Tog, ten spyte van al die sukses wat sy al bereik het, bly haar lewensleuse steeds die eenvoudige dog treffende woorde van Koos du Plessis: “Wat ek is, is net genade. Wat ek het, is net geleen”; en gaan al die eer aan haar Here God.

Suid Afrikaanse Kunstenaars

Blue Division
On Stage logo
Musiekhuis